-స్నేహితుని కుమార్తె వివాహానికి రూ.57 వేల ఆర్థిక సహాయం

రామకృష్ణాపూర్ ప్రత్యక్షత:-పాఠశాల రోజులలో ఏర్పడిన స్నేహం కాలగమనంలోనూ చెదరిపోకుండా, ఆపదలోనూ ఆనందంలోనూ ఒకరికొకరు అండగా నిలవాలని మరోసారి చాటిచెప్పారు రామకృష్ణాపూర్ సింగరేణి హైస్కూల్ 1988–89 తెలుగు మీడియం బ్యాచ్ పూర్వ విద్యార్థులు. తమ సహచర విద్యార్థి చింతల రామ్ మురళిచారి కుమార్తె వివాహానికి ఆర్థికంగా తోడ్పాటు అందించి స్నేహబంధానికి కొత్త అర్థాన్ని తీసుకువచ్చారు.శుక్రవారం రామకృష్ణాపూర్‌లోని ఆర్.కే.సి.ఓ.ఏ క్లబ్‌లో చింతల రామ్ మురళిచారి కుమార్తె వివాహం కుటుంబ సభ్యులు, బంధుమిత్రులు, ఆత్మీయుల సమక్షంలో ఘనంగా జరిగింది. ఈ విషయం తెలుసుకున్న 1988–89 బ్యాచ్ పూర్వ విద్యార్థులు ఒకే వేదికపైకి వచ్చి తమ మిత్రునికి అండగా నిలవాలని నిర్ణయించారు. అందరూ స్వచ్ఛందంగా విరాళాలు సేకరించి మొత్తం రూ.57 వేల నగదును వివాహ వేడుకలో రామ్ మురళిచారికి అందజేశారు.ఈ సందర్భంగా పూర్వ విద్యార్థులు మాట్లాడుతూ, పాఠశాల అనుబంధం జీవితాంతం నిలిచే ఆస్తి అని, స్నేహితుడి కుటుంబ ఆనందంలో భాగస్వాములు కావడం తమ అదృష్టంగా భావిస్తున్నామని తెలిపారు. కష్టసుఖాల్లో ఒకరికొకరు తోడుగా ఉండటమే నిజమైన స్నేహానికి గుర్తని వారు పేర్కొన్నారు.ఆర్థిక సహాయం అందుకున్న చింతల రామ్ మురళిచారి భావోద్వేగానికి లోనై తన సహచర మిత్రులకు హృదయపూర్వక కృతజ్ఞతలు తెలిపారు. ఎన్నో సంవత్సరాల తర్వాత కూడా తమను మరువకుండా కుటుంబ శుభకార్యంలో అండగా నిలవడం జీవితాంతం మరచిపోలేని అనుభూతిగా అభివర్ణించారు.ఈ కార్యక్రమంలో చేతి బాలరాజు, గడ్డం రాజు, సలిగంటి శ్రీనివాస్, కోమాకుల శ్రీనివాస్, తోట మల్లేష్, బీరెళ్లి రమేష్, కేడీవీ ప్రసాద్, రవీందర్, సుధాకర్ తదితర పూర్వ విద్యార్థులు పాల్గొని నూతన వధూవరులను ఆశీర్వదించారు. వారి ఐక్యతను చూసిన వివాహానికి హాజరైన అతిథులు, స్థానికులు పూర్వ విద్యార్థుల సేవా భావాన్ని, స్నేహానికి వారు ఇచ్చిన విలువను ప్రశంసించారు.సింగరేణి హైస్కూల్‌లో చదివిన రోజుల జ్ఞాపకాలను సజీవంగా ఉంచుకుంటూ, ప్రతి సంవత్సరం కలుసుకోవడం, ఒకరి కుటుంబాల్లో జరిగే శుభకార్యాలు, అవసరాల్లో పరస్పరం సహకరించుకోవడం వంటి సంప్రదాయాన్ని ఈ బ్యాచ్ కొనసాగిస్తోందని సభ్యులు తెలిపారు. భవిష్యత్తులో కూడా తమ సహచరుల కుటుంబాలకు అవసరమైనప్పుడు అండగా ఉంటామని వారు స్పష్టం చేశారు.